PJAK, kuştina Mehdî Tewekulî û malbata wî şermezar kir.

Hunermend û çalakgerê Kurd, Mehdî Tewekulî, bi diya xwe Meryem Eslanî û xwişka xwe Sumeya Tewekulî re, di 27'ê Tîrmeha 2026'an de, li ser rêya Bane û Merîwanê, di encama agirê hêzên rejîma Îranê de jiyana xwe ji dest dan.

Partiya Jiyana Azad a Kurdistanê (PJAK), di daxuyaniya xwe ya derbarê bûyerê de ragihand ku di otomobîlê de ji bilî kesên ku hatin kuştin, zarokekî din jî hebû lê belê çarenûsa wî nehatiye zanîn.

Di daxuyaniyê de hat tekez kirin ku êrîş komkujiyeke bi qestî li ser sivîlan, nîjadkujî, sûcekî li dijî mirovahiyê û terorîzm e û ji malbata Tewekulî û hemû gelê welatparêz ê Kurdistanê re sersaxî hate xwestin.

Hat bal kişandin ku komkujî li ser bingeha qanûneke ku di 26'ê Tîrmehê de derketiye û destûrê dide hêzên Komara Îslamî ku çalakger û sivîlan bikin hedef, hatiye kirin. Hate diyar kirin ku qanûna behskirî dubarekirina fetwaya cîhadê ya Xumeynî ye ku di 19'ê Tebaxa 1979'an de li dijî gelê Kurdistanê îlan kiriye û nîşana biryara rejîmê ye ku sûcên xwe yên li Kurdistanê dubare bike.

Hat xêzkirin ku derxistina qanûnê ji aliyê Meclîsa Şêwirmendiya Îslamî ya Îranê ve, bêtir eşkere dike ku ew bi parlamena hilbijartî ya gel re tu têkiliyek nîne. Hate gotin: "Ji ber vê yekê, em bangî hemû nûnerên ku xwe ji vê çemberê derve dibînin dikin ku helwesta xwe îfade bikin û vê navenda zordar bihêlin."

Di daxuyaniyê de hate diyar kirin ku Mehdî Tewekulî yê ji malbateke welatparêz a Kurd û malbata wî, di lîstikên pîs de bûne hedef û ev ji bo hemû gelên Îran û Kurdistanê îşareteke xeternak e.

Hat destnîşan kirin ku sûcê ku wekî 'komkujiya zincîrî' tê binavkirin, di heman demê de qonaxeke nû ya zexta Komara Îslamî ya Îranê nîşan dide.

Di daxuyaniyê de ev gotin cih girtin: "Gelê Kurd û gelên azadîxwaz ên Îranê yên ku dîroka tijî sûc a Komara Îslamî baş dizanin, dê vê serdema zext û zehmetiyê derbas bikin û berxwedana li dijî terorîzma dewletê bibe asteke nû. Ger Komara Îslamî bixwaze her derê bike qada teror û şîdetê, gelê me jî bi dirûşma 'Berxwedan Jiyan e' dê her derê bike qada berxwedana sivîl.

Her çend bibe sedema dûrxistina dewletê ji civakê jî, helwesta redkirin û boykotkirina sazî û kesayetiyên zextê yên rejîmê, helwesteke welatparêz e û parastina civaka sivîl e li dijî terorîzma dewletê.

Em wekî PJAK, bangî hemû partî û komên siyasî yên Kurdistanî û Îranî dikin ku li dijî pêvajoya nû ya zext, îdam û terorê ya Komara Îslamî, helwesteke hevpar nîşan bidin.

Divê civaka navneteweyî û hemû navendên mafên mirovan jî li hember vê kiryara nemirovî û terorîst bêdeng nemînin û zexta li ser Komara Îslamî zêde bikin."