Konseya Ciwanan a Partiya DEM'ê serlêdana hevdîtina bi Abdullah Öcalan re kir

Partiya Wekhevî û Demokrasiyê (DEM) ji bo Hevdîtina bi Abdullah Öcalan re Serlêdana Wezareta Dadê kir

Meclîsa Ciwanan a Partiya Wekhevî û Demokrasiyê (DEM) ji bo hevdîtina bi Rêberê Gelê Kurd Abdullah Öcalan re serî li Wezareta Dadê da. Endamên Meclîsa Ciwanan ên ku daxwazname xistin destê Wezaretê, piştre li ber Wezareta Dadê daxuyanî dan.

Endamê Meclîsê Baran Tuncay Yıldırım diyar kir ku Abdullah Öcalan bi bangxwestina xwe ya 27'ê Sibata 2025'an de deriyê avakirina erênî vekiriye û got: "Ev bang ne tenê rawestandina çekan e, di heman demê de di hişan de jî, di siyasetê de jî manifestoyeke avakirineke nû ye. Lê belê îro dewlet gavên wêrek û somut niavêje, ev yek pêvajoyê hêdî dike, tecrîda ku çend rojan e li ser Rêber Apo tê sepandin jî, vê herikîna dîrokî radiwestîne, nezelaliyê kûrtir dike û îradeya aştiyê dikeve bin siyê."

'DIVÊ BEŞDARÎYA AKTÎF A RÊBER APO BÊE PEYDAKIRIN'

Yıldırım tekez kir ku divê azadiya fîzîkî ya Abdullah Öcalan bêe peydakirin û got: "Bê perspektîf û beşdariya aktîf a Rêber Apo, ne aştiyeke rastîn û ne jî demokratîkbûneke mayînde mimkun e. Pêşveçûna diyalektîk ji tansiyona dijberan çêdibe. Lê belê ji bo ku ev tansiyon bibe sentezeke avaker, pêwîstiya bi deng, îrade û rêberiya Rêberiyê heye."

'EM AZADIYA FÎZÎKÎ DIXWAZIN'

Yıldırım diyar kir ku wek ciwanên ku hêza herî dînamîk a pêvajoyê ne, pêwîstiya wan bi deng û perspektîfa Abdullah Öcalan ji nêz ve heye û wiha domand: "Em dixwazin bi guhdarîkirina perspektîfa Rêber Apo bi xwe, rola ciwanan di avakirina aştiyê û civaka demokratîk de xurt bikin, astengan derbas bikin, gavên somut û demokratîk nîqaş bikin û azadiya fîzîkî ya Rêberiya xwe peyda bikin. Aştî ne tenê rawestandina çekan e, avakirina rêzeke demokratîk a bi rûmet, dadperwer û mayînde ye. Em wek Meclîsa Ciwanan a DEM Partiyê ji vê berpirsiyariya dîrokî haydar in. Em pabendbûna xwe ya bi bangxwestina Rêber Apo û îradeya gel a wekhevî û jiyana bi hev re ya azad dubare dikin. Em bangî hemû ciwanan û hêzên demokratîk dikin ku xwedî li vê pêvajoyê derkevin û wê organîze bikin, meşa azadiyê ya Rêber Apo mezin bikin. Dîrok bi kesên ku wêrekî nîşan didin re ye. Tu asteng, tu bêpaxî vê meşê ranawestîne."

Daxuyanî bi dirûşma "Bijî Serok Apo" bi dawî bû.