Tülay Hatimoğulları: Aştî bi rêxistinbûn û têkoşînê tê bi dest xistin.

Hevserokê Giştî yê Partiya Wekhevî û Demokrasiyê (DEM Partî) Tülay Hatîmogulları li Festîvala 16emîn a Çandî ya Dêrsîmê ya Ewropayê ya li bajarê Frankfurt ê Almanyayê axivî.** Tülay Hatîmogulları di axaftina xwe de li ser gelek mijaran nirxandin pêk anî; ji pêşketinên Rojhilata Navîn, êrîşên li ser Elewiyan li Sûriyeyê, polîtîkayên şerê taybet ên li Dêrsîmê heta Pêvajoya Aştiyê û Civaka Demokratîk a li Tirkiyeyê. Hatîmogulları diyar kir ku aştî bi xweber nayê û got: “Aştî dê li ser sîniyek zêrîn neyê pêşkêşkirin. Aştî dê bi rêxistinbûn û têkoşînê bê bi destxistin.”

BERSÎVA LI SER ÊRÎŞÊN LI SER ELEWIYAN

Tülay Hatîmogulları diyar kir ku di serdema rêveberiya HTŞ’ê li Sûriyeyê de êrîşên li ser Elewiyan didomin û got ku Elewiyên Ereb ên li Lazkiyê, Hamayê, Humusê û Şamê tên hedefgirtin. Hatîmogulları, ku beşdarî konferansek jinan bû, got ku jinên Elewî komkujiyên ku pê re rû bi rû mane vegotine û wiha got: “Dema ez guhdariya wan dikim, ez bi xwe dîsa Maraş, Sîwas û Dêrsîmê dijîm.” Hatîmogulları her wiha behsa rewşa xwendekara bijîşkiyê Betûl Suleyman, ku yek ji jinên ciwan ên Elewî yên revandî ye, kir û diyar kir ku ew ji ber nasnameya xwe ya Elewî tê zordestîkirin û bang li hevgirtinê kir.

'DÊRSÎMÊ WEK LABORATUWAREK BI KAR TÎNIN'

Tülay Hatîmogulları got ku polîtîkayên şewitandina gundan û koçberiya bi zorê ya salên 1990î îro bi rêbazên cuda tên domandin û diyar kir ku bi riya narkotîkê, çetebûnê û pratîkên şerê taybet bi taybetî ciwan tên hedefgirtin. Hatîmogulları got: “Dêrsîmê wek laboratuwarek girtine destê xwe” û diyar kir ku hewl tê dayîn ku ciwan ji ziman, bawerî û nirxên civakî yên xwe bên qutkirin. Hatîmogulları her wiha behsa dosyayên Gulistan Doku û Rojîn Kabaiş kir û diyar kir ku divê van bûyeran ronî bibin û got: “Divê lêpirsîn kûr bibe, her ku dawiya van têkiliyan digihîje çi dibe bila bibe.” Hatîmogulları, ku diyar kir li Dêrsîmê jin tên hedefgirtin, bi navên Gulistan Doku û Rojîn Kabaiş wiha got: “Em li keçên winda yên Dêrsîmê digerin. Jin dê li hemberî wê têgihiştina ku bi rêbazên cuda hewl dide jinan tune bike, berxwedana xwe bidomînin.”

'BANGA ÖCALAN LI CÎHÊ XWE YE'

Tülay Hatîmogulları beşeke girîng a axaftina xwe terxanî pêvajoya aştiyê kir û got ku banga Rêberê Gelê Kurd Abdullah Öcalan a 27ê Sibatê hê jî derbasdar e. Hatîmogulları diyar kir ku piştî banga Abdullah Öcalan, aliyên peywendîdar hin gav avêtine û niha divê hikûmet gavên berbiçav bavêje. Hatîmogulları got: “Gava herî girîng a ku tê payîn derxistina qanûna çarçoveyê û bidestxistina statuyek qanûnî û hiqûqî ji bo birêz Öcalan e.”

'OPERASYONÊN LI SER CHP'Ê AŞTIYÊ SABOTE DIKIN'

Tülay Hatîmogulları rexne li operasyonên dadî yên li ser Partiya Komarî ya Gel (CHP) girt û diyar kir ku van destwerdanan siyaseta demokratîk dike hedef. Hatîmogulları, ku wek DEM Partî li dijî van operasyonan derketine, got: “Li pêşiya aştiyê asteng tên çêkirin. Van operasyonan pêvajoya aştiyê sabote dikin.” Hatîmogulları got ku divê serokatiyên qeyûmî bên rawestandin, hilbijartiyên ji kar hatine rakirin vegerin ser karên xwe û şaredarên girtî bên berdan.

BIRYARÊN AÎHM'Ê

Her wiha Tülay Hatîmogulları xwest ku biryarên Dadgeha Mafên Mirovan a Ewropayê û Dadgeha Destûra Bingehîn bên bicihanîn û bang li berdanê kir ji bo Osman Kavala, Can Atalay, Çîgdem Mater, Selahattîn Demirtaş, Fîgen Yüksekdağ û girtiyên Doza Kobanê.

'EMÊ BI HEV RE AŞTIYÊ AVA BIKIN'

Tülay Hatîmogulları diyar kir ku Rojhilata Navîn serdemek zehmet derbas dike û got ku tevî vê yekê jî ew ê ji têkoşîna aştiyê dest bernedin. Hatîmogulları silav li têkoşîna Dayikên Aştiyê û Dayikên Şemiyê şand û got: “Aştî bi hêviyê nayê. Ew ê bi têkoşîna hevpar a jinan, ciwanan, Elewiyan, gel û baweriyên cuda bê avakirin. Em bawer dikin ku di dema herî tarî ya tariyê de em ê derkevin ronahiyê.”