Hawar û alfabeya Kurmancî ya bi tîpên Latînî

Kurmancî bi sedsalan bi tîpên Erebî hate nivîsîn. Di destpêka sedsala 20an de ceribandinên cuda yên bi tîpên Latînî hatin kirin; di 1929an de ji bo Kurdên Yekîtiya Sovyetê jî alfabeyeke Latînî ya cuda hate amadekirin. Lê alfabeya ku îro di Kurmancî de bi berfirehî tê bikaranîn, bi kovara Hawar a ku Celadet Alî Bedirxan di 15ê Gulana 1932an de li Şamê dest bi weşandinê kir bi cih bû. Alfabe ji 31 tîpan pêk tê; bi dengdêrên bi şapik ên wek ê, î, û û bi tîpên ç, ş dengên Kurmancî yek bi yek nîşan dide. Hawar bi navber heta 1943an derket. Celadet Bedirxan bi birayê xwe Kamuran Bedirxan û zimanzanê Fransî Roger Lescot re xebatên rêzimanê jî domandin; ev xebat bûn bingeha zimanê nivîsê yê Kurmancî. Hûn dikarin hemû hejmarên Hawarê ji lînka di tomara “Kovara Hawar” a Kitaphaneyê de bixwînin.