Rapora Trump û Epstein ji Demokratan: Îdîayên destavêtinê di dosyaya Meclisê de

Li DYAyê gava nîqaşên li ser dosyaya Jeffrey Epstein berdewam in, endamên Demokrat ên Komîsyona Dadmendiyê ya Meclîsa Nûneran roja duşemê belgeyeke 50 rûpelî dan nasandin. Belgeya navborî îdiayên êrîşa zayendî yên li dijî Serok Donald Trump dihewîne. Di raporê de, digel gotinên 11 jinan, belgeyên FBIyê û materyalên ku berê di dosyaya Epstein de derketibûn holê, li hev hatine civandin.

Li gorî belgeyê, hinek ji jinan Trump bi destavêtinê an jî êrîşa zayendî tawanbar dikin. Hinek jî îdia dikin ku ji aliyê Epstein an Maxwell ve ji bo têkiliya zayendî li ber Trump hatine pêşkêşkirin. Tê tomarkirin ku piraniya îdiatan di salên 1990î de qewimîne. Endamên Demokrat diyar kirin ku wan bi berawirdkirina vegotinên cuda hewl da zincîreya dema bûyeran ava bikin û lihevhatina di navbera gotinan de bipîvin. Di raporê de tê îdiakirin ku ev vegotin bi gotinên Trump ên ku ew tenê bi Epstein re nasînek heye re li hev nayên.

Yek ji şahidiyên balkêş ên raporê ya Beatrice Keul, şahbanûya berê ya bedewiyê ya Swîsreyê û model e. Keul diyar kir ku di çileya Mijdarê ya 1993an de, di dema çalakiyeke pêşbirka bedewiyê de li Plaza Hotel a ku xwediyê wê Trump e, Trump dest avêtibû wê. Ev îdia, li gorî vegotina wê ya ku berê derketibû holê, di raporê de bi awayekî berfirehtir cih digire. Li gorî gotina Keul, Trump gotibû ku ew dikare ji bo wergirtina vîzeya DYAyê û qebûlkirina wê li Zanîngeha New Yorkê alîkariyê bike. Paşê Epstein hatibû cem wê û xwe wek hevalê nêzîk ê Trump danasîbû û pêşniyar kiribû ku ew beşdarî partiyeke li Mar-a-Lago ya Floridayê bibe. Keul vegot ku ew roj hatibû gazîkirin odeyeke otêlê, û paşê Trump dest avêtibû wê.

Di raporê de her wiha tê îdiakirin ku Trump û Epstein di salên 1990î de bi rêya ajansên modeltiyê, pêşbirkên bedewiyê û vexwendinên cihêreng bi jinên ciwan re têkilî danîne. Endamên Demokrat her wiha vegotinên hinek jinan jî berawird kirin ku ew bi soza kar, vîze an qebûlkirina zanîngehê rastî wan hatine.

Endamê payebilind ê Demokrat ê komîsyonê Jamie Raskin îdia kir ku Wezareta Dadmendiyê di bin rêveberiya Trump de lêpirsînan rawestandiye, hinek delîlan bi zanebûn veşartiye û rê li ber Maxwell girtiye ku li ser qurbaniyeke ku Trump tawanbar dike xeber bide. Raskin îdia kir ku ev helwest dibe ku armanca wê parastina serok be. Di raporê de her wiha hate diyarkirin ku Wezareta Dadmendiyê û FBIyê hinek belge eşkere nekirine û lêpirsînên li ser hevkarên potansiyel ên tawanê hatine astengkirin. Raskin daxwaz kir ku îdia bi destê dozvanek taybet a serbixwe were lêpirsînkirin, belgeyên têkildar ji Kongreyê re were dayîn û delîl bi dozgeriyên eyalet û welatên biyanî re were parvekirin.

Trump tawanbarên têkildarî Epstein qebûl nake. Qesra Spî jî rapor wek ya bi armanca siyasî dinirxîne û îdiatan red dike.