Li Fransayê Jin Ji 19ê Mijdarê Heta Dawiya Salê 'Belaş' Dê Bixebitin

Bultena nûçeyan a femînîst Les Glorieuses, îsal jî dîroka cudahiya mûçeyan a ku ji sala 2016an vir ve her sal diyar dike eşkere kir. Li gorî daxuyaniyê, heke jin bi heman mûçeya navînî ya saetê ya mêran bistînin, dê 19ê Mijdarê saet 10.51 de bigihîştibûna dahata xwe ya salekê. Ji vê dîrokê heta dawiya salê jin dê bi rastî belaş bixebitin.

Daneyên herî dawî yên Eurostatê yên sala 2024an nîşan didin ku li Fransayê jin bi navînî %11,8 kêmtir ji mêran qezenc dikin. Rêjeya li seranserê Yekîtiya Ewropayê jî %11,1 e. Li Fransayê cudahiya mûçeyan di sala 2023an de %12,3 hatibû tomarkirin. Cudahî ji asta %16,7 ya sala 2018an vir ve bi qonax kêm dibe.

Damezrînera Les Glorieuses Rebecca Amsellem bi AFP re axivî. Amsellem kêmbûna cudahiya mûçeyan erênî dibîne, lê dibêje ku nirxandina newekheviyên aborî tenê li ser bingeha meaşan ne bes e. Amsellem got: "Cudahiya mûçeyan, di heman demê de cudahiya azadiyê ye" û tekez kir ku jin ji ber nebûna îmkanên aborî neçar dimînin ji hin proje û veberhênanên xwe dest bidin.

Rêxistin dixwaze ku ji bo kêmkirina cudahiya mûçeyan, gihîştina şîrketan a îhaleyên giştî û alîkariyên dewletê bi şerta lihevanîna bi wekheviya mûçeyan ve were girêdan. Amsellem difikire ku ev rêzikname ji dewletê re lêçûnek zêde nayîne. Les Glorieuses herwiha daxwaz dike ku di qadên mîna lênihêrin û perwerdehiyê de ku jin bi giranî tê de dixebitin, mûçe baştir bibin. Amsellem dibêje ku ev kar ji bo yekbûna civakê pêwîst in. Di nav pêşniyaran de ji bo her du dêûbavan piştî jidayikbûnê destûra dayikê ya wekhev û bi tevahî bi mûçe jî heye. Amsellem dibêje ku ev sepandin li Portekîz û Spanyayê encamên erênî daye. Rêxistin di dawiyê de daxwaz dike ku dîrektîfa şefafiya mûçeyan a Yekîtiya Ewropayê ya sala 2023an li Fransayê bikeve meriyetê. Pêşnûmeya qanûnê ya vê mijarê di meha Îlonê de hatibû pêşkêşkirina Meclîsa Wezîran.