Öztürk: Yasa hê destpêk e, divê em bibêjin têkoşîn berdewam e

Di pêvajoya Aşitî û Civaka Demokratîk de, li qonaxa ku hatiye gihiştinê, Tirkiye cara yekemîn rêziknameyek qanûnî anî Meclîsê. Qanûna ku wek qanûna çarçoveyê hat nasandin û bi navê 'Qanûna Derbarê Xurtkirina Hevgirtina Neteweyî û Yekbûna Civakî' hatiye Meclîsê, di dîroka dewleta Tirkiyeyê de wek yekemîn tê nîşandan.

Wateya vê qanûnê Serokê Giştî yê Partiya Karkerên Tevgerê Hakan Öztürk ji Ajansa me re nirxand.

'TÊKOŞÎNA MAFÊN GELÊ KURD GIHÎŞTIYE QONAXEKE GIRÎNG'

Öztürk ku diyar kir ku bi qanûnê re gaveke dîrokî hatiye avêtin, destnîşan kir ku bi qanûnê re di warê qanûnî de jî destpêkek pêk hatiye û wiha domand: "Bi vê qanûnê re gaveke gelek dîrokî ya yekemîn hate avêtin. Tê gotin ku di siyasetê de meseleya mezin destpêkirin e, tew destpêkirin nîvê qedandinê ye. Bi vê qanûnê re di warê qanûnî de destpêkek pêk hat. êdî tiştên ku dê bên kirin ne di rewşa nivîsandina ser avê de ne. Di qanûnê de tê nivîsîn ku cezayên pêşbînîkirî dê bên paşxistin. Em dikarin vê yekê wek rakirina kevirên li ser riya ku em ê pê ve biçin bibînin.

Têkoşîna mafên gelê Kurd mijar gihandibû qonaxeke girîng. Bi saya wê têkoşînê em tu carî ji sifrê dest pê nakin, em ji cihê ku lê mane didomînin. Em dixwestin mijara mafên gelê Kurd civakî bibe, em dixwestin siyasî bibe, em dixwestin bê Meclîsê, em dixwestin qanûnên serdema derbasbûnê derkevin û niha ev hemû pêk hatin. Gelê Kurd dema ku van mijaran dihatin nîqaşkirin digot 'Abdullah Öcalan îradeya min e, ew me temsîl dike û divê muzakereyan ew birêve bibe', ev jî pêk hat.

Ger em ji hêla jor ve li rewşê binêrin, îdiaya bêavbûna rejîmê têk çû. Mafên gelê Kurd êdî mijareke ku rejîm jî qebûl kiriye û destpêkek pêk aniye ye. Em hewl didan ku ji bo civakîkirina aşitiyê bi awayekî pir zor û zehmet vebêjin. Niha nakaratên îdeolojiya fermî şikestin. Domandina teranên teror, parçebûn, hebûn û hêzên derve û bi van tiştan re xweliya li çavên gel kirin êdî ne hêsan e."

'DIVÊ QANÛN HEMÛ KESÎ BIGIRTA'

Öztürk ku destnîşan kir ku di qanûnê de kêmasiyên hene, wiha got: "Bêguman hene lê ji bo destpêkirinê ne mumkin e ku meriv xaleke 'bêkêmasî' diyar bike. Divê qanûn bi piranî ne li ser infazê bûya, divê hemû kesî bigirta, divê sînordarkirina siyasetê neanîba, divê di rewşa Abdullah Öcalan de guhertineke zelal çêkira û divê rasterast mafên xwezayî yên gelê Kurd bihata nîqaşkirin. Tevî van hemûyan jî em dikarin bêjin lingê şeytan şikest."

Öztürk ku got ku nîqaşên referandumê yên hin derdoran ne tiştekî ku bê hesibandin e, wiha got: "Ev ne tiştekî ku bê hesibandin e. Bi muzakereyan hatiye gihiştin xalekê, metot ev e. Gotina ku em rewşeke bi meseleya kurdî re têkildar ji nifûsa din a ku di piraniyê de ye bipirsin qet ne adil e. Dema ku bi salan şovenîzm hatiye çandin nav civakê û qutbûn hatiye afirandin, bi rêbaza referandumê encameke erênî nayê bidestxistin. Eger tê xwestin ku meriv adil be, divê rasterast û tenê ji gelê Kurd bê pirsîn ku ew li ser xwe çi dixwaze. Di vê mijarê de aliyê xwediyê mafê tenê ew e."

'KLÎMA SIYASÎ BI VÊ QANÛNÊ RE DÊ DESTPÊ BIKE GUHERIN'

Öztürk ku tekez kir ku qanûn destpêkek e û têkoşîn didome, behsa girîngiya civakîkirina aşitiyê kir û wiha got: "Ev hê destpêk e, divê em bêjin têkoşînê bidomînin. Li gorî serdemeke ku di destê me de gelek kêm amûrên dijî şovenîzmê hebûn, niha xwediyê îmkanên girîng in. Kesên ku ji bo mafên gelê Kurd têkoşînê dikirin dihatin hewldan ku wek 'tawanbarên bê sedem û armanc' bên nîşandan. Îro jî hatiye qonaxa ku tê gotin divê Abdullah Öcalan 'koordînatoriya pêvajoya aşitiyê û siyasîbûnê' bi ser xwe bigire. Wê demê em dibêjin ku armanc afirandina aşitiya gelan e. Bidestxistina mafên nasname û zimanê gelê Kurd e. Tiştekî wek 'tawan ji bo tawanê' tune ye.

Ji van hemû pêşketinên nû yekem, em dikarin ji bo civakîkirina aşitiyê raveker bin. Ne deklarasyonî lê îmkanên me yên raveker û qayilker êdî pir zêdetir in. Klîma siyasî bi vê qanûnê re dê destpê bike guherîn. Statuko wek xwe nayê domandin. Hem guherîna klîmayê û hem jî bi riya vê qanûnê hemû aktorên têkoşer ên ku dê tevlî pêvajoyê bibin dê rêveçûnê bi piranî biguherînin. Divê em dest bi bazdanê li ser riya rast a ku li ber me vebûye bikin. Em ê li ser rê rastî yên din ên ku dê bazdin bên."