Dayikên Aştiyê berê xwe dan Enqereyê: Bila binpêkirin biqedin, deriyên Îmraliyê vebin

Dayikên Aştiyê yên ku dê du rojan li Enqereyê "Nobedariya Aştiyê" li dar bixin, ji bo beşdarbûna çalakiyê li Wan û Amedê kom bûn. Jin bi otobûsan berê xwe dan paytextê.

Di nav komê de dayikên 70 salî jî hene; wan bi slogana "Bijî Berxwedana Dayikan" û "Jin Jiyan Azadî" siwarî erebeyan bûn. Berî derketinê dayikên ku bi ajansa me re axivîn, sedem û hêviyên xwe yên çalakiyê anîn ziman.

Dayikan diyar kirin ku ew diçin Enqereyê ji bo azadiya Abdullah Öcalan, serkeftina Pêvajoya Aştiyê û Demokrasiyê, bidawîhatina binpêkirinên giran li girtîgehan û ji bo ku êdî êş neyê jiyîn. Wan tekez kir ku daxwaza aştiyê berpirsiyariya hevpar a hemû beşên civakê ye.

Dayikan destnîşan kirin ku ew ê heta daxwazên wan bên cihê ji têkoşînê bernedin û bang li her kesî kir ku piştgiriyê bidin Pêvajoya Aştiyê û Demokrasiyê û Nobedariya Aştiyê ya li Enqereyê.