Lêkolîn: Li Fransa'yê ji sedî 22 yên ciwanan rastî êrîşên wek destavêtinê hatin

Lêkolîneke li Fransa'yê hat belavkirin, nîşan da ku şiddeta cinsî di nav ciwanên 18-21 salî de çiqas berbelav e. Di çarçoveya xebata bi navê "Vavisa" (Jiyana Hestî û Şiddeta Cinsî di Dema Ciwanî de) de, bi 2 hezar û 269 ciwanan re anketa anonîm hate kirin. Lêkolîn bi daxwaza komeleya CVM ya ku li dijî şiddeta li ser kesên reşit têdikoşe hate kirin û ji beşdaran hate xwestin ku rewşên di jiyana xwe de rastî wan hatine bibêjin. Lêkolîneran bersivan li gorî mercên hatine diyarkirin wek şiddeta cinsî senifandin.

Li gorî vê, ji sedî 21,9 yên ciwanan diyar kirin ku rastî kiryarên ku penetrasyona oral, vajînal an anal dihewînin û dikevin çarçoveya destavêtinê hatine. Her wiha ji sedî 37,1 yên beşdaran gotin ku herî kêm carekê, bêyî ku bixwazin, rastî kiryareke bi naveroka cinsî hatine. Di nav sedemên van rewşan de ev hatin rêz kirin: ji bo dilxweşkirina aliyê din qebûl kirin, ji sedî 34,5 nikaribûn tevbigerin, ji sedî 21,8 tehdît, şiddet an bi zorê hatin girtin, û ji sedî 20,6 di bin bandora alkol an tilyakê de bûn.

Xebat ne tenê destavêtin û êrîşên fîzîkî, her wiha rûbirûbûna bi naverokên pornografîk ên bê razîbûn, ensest, şiddeta dîjîtal û îstîsmara cinsî jî girtiye nav xwe. Ji sedî 63 yên beşdaran gotin ku di jiyana xwe de herî kêm carekê rastî şiddeta cinsî hatine. Ji sedî 9 yên van kesan diyar kirin ku tecrûbeya xwe ya yekem a şiddeta cinsî ensest bû; faîlê herî zêde hat nîşandan jî pismamên ji nav malbatê bûn. Ji sedî 56 yên ciwanan ragihandin ku cara yekem bêyî xwestina xwe bi naveroka pornografîk re rûbirû bûne, û ji sedî 46 jî gotin ku bêyî razîbûna wan peyam an wêneyên bi naveroka cinsî ji wan re hatin şandin.

Rêjeya kesên ku diyar kirin rastî îstîsmara cinsî hatine ji sedî 5,3 bû. Van ciwanan gotin ku li hemberî kiryareke fîzîkî an naveroka cinsî ya serhêl pere an berjewendiyeke din bi dest xistine. Ji sedî 17 yên beşdaran diyar kirin ku dikarin rewşeke wiha binirxînin, ji sedî 24 jî gotin ku kesekî ku rastî îstîsmara cinsî hatiye nas dikin.

Lêkolînê nîşan da ku şiddeta cinsî di nav ciwanên di bin çavdêriya xizmetên parastina zarokan (Aide sociale à l'enfance) an Saziya Parastina Dadî ya Ciwanan (Protection judiciaire de la jeunesse) de bilindtir e. Ji sedî 80 yên ciwanên di bin çavdêriya xizmetên parastina zarokan de û ji sedî 87 yên di bin çavdêriya Saziya Parastina Dadî ya Ciwanan de ragihandin ku herî kêm tecrûbeyeke şiddeta cinsî jiyane.

Encam li ser bersiva 1.843 kesên 18-21 salî yên ji panela Ipsos BVA hatine hilbijartin û 426 kesên ku bi girêdana vekirî ya komeleya CVM beşdarî anketê bûne, disekinin. Xebat bi hevkariya Midûriyeta Giştî ya Hevgirtina Civakî (DGCS), Zanîngeha Sorbonne, Inserm û Nexweşxaneyên Giştî yên Parîsê (AP-HP) hate meşandin.