DYA'yê girava Qeşmê ya li Tengava Hurmuzê ya Îranê bombebaran kir

Girava Qeşmê ya ku li Tengava Hurmuzê ya Îranê ye, roja duşemê ji aliyê DYA'yê ve hate bombebaran kirin. Li gorî nûçeya Wall Street Journalê ku li ser rayedarên Amerîkî hatiye dayîn, ev êrîş ji bo astengkirina gefên gengaz ên li ser veguhastina deryayî ya bazirganî ya Îranê bûn. Rayedaran ev kiryar wek gavên parastinê yên ji bo pêşîgirtina li gef an êrîşên Îranê yên li ser rêyên deryayî yên bazirganî bi nav kirin.

Hate gotin ku ev bombebaran beriya hilbijartinên navberê yên li DYA'yê hate kirin û endamek ji zincîra êrîşên sînordar e ku Washington di hefteyên dawî de li dijî Îranê pêk aniye. Li gorî nûçeyê, artêşa Amerîkî hewl dide ku ev lêdan heta ku mimkûn e veşartî bimînin da ku neyê fikirîn ku operasyoneke leşkerî ya nû û berfireh dest pê dike. Ajansa fermî ya Îranê IRNA jî berê ragihandibû ku li girava Qeşmê pênc teqîn hatine bihîstin û niştecihên herêmê du balafiran li asîmanê dîtine. Wezareta Parastinê ya DYA'yê ku AFP'ê daxwaza ravekirinê jê kiribû, mijar arasteyê fermandariya leşkerî ya DYA'yê ya li Rojhilata Navîn CENTCOMê kir; heta niha ji CENTCOMê ti ravekirin nehatiye.

Serokê DYA'yê Donald Trump dema ku li ser Îranê daxuyaniyên li hev naketin didomîne, roja duşemê got ku bi Tehranê re dikare li hev bê. Di paylaşima xwe ya li ser hesabê Truth Social de, daketina bilez a bihayê neftê bi vê hêviyê ve girêda ku bi Îranê re şer çênabe. Trump got: "Îran dixwaze bi lez û bez li hev bê. Ev dikare pêk bê!" Lê roja yekşemê gotibû ku amade ye "lêdana giran" li Îranê bixe.

Cîgirê Serokê DYA'yê JD Vance jî di daxuyaniya xwe ya roja duşemê de got ku ew bi Trump re li ser gihîştina li hevkirineke muzakerekirî ya ku dê şer bi Îranê re bi dawî bike "pir bi hêvî" ne. Vance diyar kir ku wan bi Îraniyan re çend hevdîtinên avaker pêk anîne û berê bi Trump re jî axiviye. Vance got: "Serok û ez, li ser îhtîmala gihîştina li hevkirineke muzakerekirî pir bi hêvî ne." Dîsa jî li ser wê yekê ku li hevkirin kengî dikare pêk bê tu teqwîm parve nekir.